雖然財爺鬍鬚曾口話對恒隆集團主席陳啟宗發火批評佢係「大罪人」毫不介意,但前日就化身鍵盤戰士喺網誌反擊。佢尋日出席新界潮人總會午餐座談會,就再做人肉錄音機不斷播帶,企圖洗脫「大罪人」指控。佢話政府每年制訂財政預算案時,都會以「量入為出」為最大原則,力求收支平衡,而決定增加政府開支時係考慮「應使則使」嘅原則。

鬍鬚曾又話由於公共資源有限,政府冇可能喺同一時間內滿足所有社會訴求,因此要透過比較,按重要性同急切性決定唔同政策嘅緩急優次。佢覺得預算案方向必須要以政策為本,唔可能單憑佢一個人嘅意志去做決定,又話社會各界唔應該純粹因為政府口袋裏有錢,就天馬行空咁諗出一啲未經審核、模糊不清嘅口號式措施「為使而使」,否則會影響政策質素同公共資源嘅可持續性。雖然佢播足十幾分鐘帶重彈舊調,但睇得出仍然未放低被指斥為「大罪人」嘅包袱。

第一手消息請下載on.cc東方互動iPhone/iPad/Android/Windows Phone Apps