政壇：陳啟宗秘閃避隔空罵戰
陳啟宗（左）尋日同澳洲外交部長卡爾午宴後，靜靜雞從秘道離開。
早前恒隆地產主席Ronnie陳啟宗炮轟財爺鬍鬚曾未能做到應使則使，歷史會證明佢係「大罪人」，激發鬍鬚曾先後幾次反擊，咁啱身兼亞洲協會香港分會主席嘅Ronnie尋日以主人家身份舉行午餐會招呼訪港幾日嘅澳洲外交部長卡爾（Bob Carr），但午餐會後佢隨即靜靜雞喺秘道離開。莫非佢忽然覺得相嗌唔好口，唔想再隔空罵戰？
陳啟宗（左）尋日同澳洲外交部長卡爾午宴後，靜靜雞從秘道離開。
不過，Ronnie同卡爾喺午餐會台上有講有笑，期間仲記者上身，問卡爾點樣看待中日就釣魚島嘅爭議。卡爾作為資深外交官，被Ronnie逼埋牆角亦無奈接招，指好多重大衝突都係由細小爭議引發，但澳洲喺事件嘅立場就係「冇立場」，搞到Ronnie有啲冇癮。不過，卡爾就話對香港最終實行普選感到樂觀，算係冇令大家失望喇。
