設計圖片及對白

社民連自從經歷幾次內部分裂後,實力已同全盛時期差好遠,依家可以話係「單天保至尊」,全靠「長毛」梁國雄一人支撐大局,兼做社民連嘅吉祥物。社民連副主席吳文遠話,依家佢哋大把支持者,義工亦唔少,但偏偏肯拋個身出嚟參選嘅人一隻手數得晒,「有兵無將」嘅情況下,惟有向學民思潮埋手,睇下當中有無潛質中人可以加入「丐幫」。

設計圖片及對白

相信大家都記得,社民連自大前年分裂出人民力量後,動員力同號召力都已大不如前,但近月人力內鬥,又令社民連人氣升番少少,好似早前反發展局局長陳茂波遊行,吳文遠身邊總有幾位年輕貌美OL同女大學生支持者,佢亦承認近呢半年社民連不乏生力軍,支持者亦唔少,但無人肯行前多一步參選,係佢哋最大嘅困擾。

鍾情學運人士有前科

長毛都已經五十七歲,社民連唔可以一味靠佢打江山,所以有人向吳文遠獻計,不如向學民思潮招手,吳文遠話聽聞有幾位學民仔都入咗社民連,但就唔知係邊個,而佢就有一個心水人選,但就賣關子唔講住,總之唔係黃之鋒喎!之不過,就算學民仔加入,都要等佢哋夠「秤」,即係到咗法定參選年齡先有資格參選,又係遠水救唔到近火,睇嚟仲要慢慢湊下先得嘞!

其實,學民仔之所以咁多人支持,唔多唔少都同學生身份夠晒純潔有關,加入社民連後係咪保持到呢份純潔,真係冇人知。不過,社民連鍾情學運人士都有迹可尋,前主席陶君行咪係土炮學運領袖囉!

第一手消息請下載on.cc東方互動iPhone/iPad/Android/Windows Phone Apps