施政混亂拒道歉 港產官僚不知恥

嗱，太一叮無冤枉港產官僚o架。申訴專員黎年係咁講嘅，申訴專員公署上年處理咗二千二百多宗針對政府部門嘅投訴，當中只有三百多宗即一成半嘅投訴人獲部門致歉，其餘八成半都係公署介入後部門先至願意道歉。黎年批評，政府部門普遍存在拒絕道歉嘅情況，原因可能係擔心影響面子、不願認錯，同埋擔心道歉後會引起刑事或民事責任等，所以建議本港參考其他普通法國家，訂明道歉言詞唔會用作法庭證供。

大家明白啦，港府施政烏龍百出甩頭甩髻，被人狂插都毫無改善，原因就係死不認錯，死不悔改！

一句真誠嘅道歉，係對受害人最起碼嘅補償；一聲由衷嘅認錯，係犯錯者最基本嘅良知。如果港產官僚連道歉都唔願意，又點令人相信佢哋真心認錯呢？如果政府部門唔肯認錯，又點可能改錯呢？所以話，港府施政一年衰過一年，而投訴排行榜三甲位置年年由食環署同屋宇署等幾個糜爛部門佔據，真係唔係冇理由o架！

律政司話，會考慮制訂法例，讓公營機構作出道歉而毋須擔心日後帶來法律責任喎。即係咁，錯而能改先至稱得上係真心道歉，推動官場道歉文化固然係好事，但如果港產官僚將道歉當擋箭牌，次次批評接受，態度照舊，問題一樣無解決嘅咋。大家仲記唔記得呀，前特首曾蔭權爵士被踢爆連串貪腐醜聞，都出來表演過「扮哭無淚」道歉騷o架，大家信唔信佢係真心認錯吖？仲有海事處處長廖漢波對南丫島海難嘅「遲來的道歉」，大家又信唔信佢係發自內心吖？

咁講啦，廉價嘅道歉唔止唔值錢，更加呃唔到人。港府部門若然唔想丟人現眼，永遠淪為申訴專員同審計報告嘅人肉箭靶，最緊要都係痛定思痛，承擔責任，改善施政，提高效率。當然啦，錯就要認，打就要企定，道歉呢個基本動作係絕對唔慳得嘅。古人都有話啦，過而能改，善莫大焉，如果港產官僚錯而不認，過而不改，就係罪莫大焉！

係呢，港產官僚被申訴專員踢爆犯錯唔肯道歉，唔知幾時至肯洗心革面，出來集體道歉呢？叮！