城中鏡：余鵬春攜妻拍拖義賣
余鵬春捐出香水及日用品義賣，更化身店員推銷商品，落力推銷手上呢支名牌墨水筆。
樂施會屬下嘅樂施商店尋日舉行旗艦活動「名牌義賣周」，近期由裕華國貨董事副總經理「升呢」做總經理嘅余鵬春同太太Ida徐菊霞拍住拖嚟撐場，佢哋擔任活動嘉賓之餘，更親力親為打理店務。余鵬春喺店內外滿場飛極力推銷商品，Ida就企喺收銀機前做到冇停手，又親自下廚炮製咗幾味拿手印尼菜宴客，認真落力，唔講仲以為佢哋係店東。
余鵬春捐出香水及日用品義賣，更化身店員推銷商品，落力推銷手上呢支名牌墨水筆。
余徐菊霞做到冇停手，態度認真，儼如老闆娘。
余鵬春（左）搵來戴德豐（中）一齊響應義賣籌款，樂施會董事會成員梁愛詩（右）都有出席。
余鵬春話上半年好忙，上周終於有時間抖抖，兩夫婦即刻飛去澳洲探望在學嘅一對仔女，再去泰國陪愛妻出席一個瓷畫展。佢透露，大仔修讀圖像設計，細女則攻讀法律，佢話好鼓勵兒女追尋自己興趣，從無強迫佢哋繼承家族生意。佢又話最近有意進軍加拿大地產，事關佢好多年前趁住移民潮，於當地購下唔少商舖，之後一直放租，直至最近先再收回發展。
戴德豐游說妻女捐名牌
同場嘅四洲集團主席戴德豐話係余鵬春介紹佢嚟呢度捐贈物資，今次都有捐出部分衣物。佢話平時買衫嘅品味好廣泛，乜嘢牌子都會買。戴德豐嘅愛女戴凱欣活躍於社交界，經常要出外應酬，名牌靚衫靚袋自然唔少得。戴德豐話已游說咗太太同囡囡一齊捐出名牌義賣，做善事之餘又可響應環保。
該會顧問Anne Hodson話呢間商店已有三十六年歷史，每年單靠義賣名牌籌得嘅善款逾一百二十萬元，用作扶貧救災及機構發展。
