政壇：搞搞政：烈女袁彌明吸OL粉絲
設計圖片及對白
人民力量早前改選，由Erica袁彌明出任主席。人力出名激進，部分人就質疑港姐出身嘅Erica會唔會同人力格格不入。點知Erica就話自己其實係烈女，同人力好配合咁話。不過，始終作為女性，佢都希望由佢出任人力主席，可以令人力「喺剛烈之中帶番一絲柔性」，吸引多啲平時對政治唔敏感嘅OL（辦公室女郎）、中產同年輕主婦喎！
設計圖片及對白
港姐通常都畀人斯文、優雅嘅感覺，同人力呢類激進組織可以話大纜都扯唔埋，但Erica當選人力主席就證明世事係無絕對嘅。佢仲話自己由始至終都係咁激，對政改原則揸得非常緊，「你覺得我斯文，好多人都覺得我好激，未必去到遊行示威衝擊嗰種激，但整體畀人嘅印象都係烈女！」
Erica又賣花讚花香，話人力好多人才，佢喺佢哋當中自然就顯得資歷低。不過，Erica就話女性對政治唔敏感，對激進組織嘅理念亦唔了解，佢就希望可以透過知名度吸引多啲女性支持者。
佢除咗將致力參與政改運動同網絡廿三條政策研究外，後日亦會去中環遮打花園絕食。自言絕食當減肥嘅佢就話唔怕冇嘢食，至怕係瞓街時吸引咗啲蚊同癡漢喎！
