政壇：同路人與愛港力劃清界線
愛港力被指搗亂普選論壇。（資料圖片）
以陳淨心為首嘅愛護香港力量前日被指搗亂普選論壇，令論壇演變為罵戰之餘仲被迫腰斬，各界槍口隨即一致指向愛港力，由建制派牽頭嘅論壇主辦單位青年時事評論員協會同愛港力劃清界線，成日強調和平理性非粗口非暴力嘅「佔領中環」行動三名召集人亦宣布「有你冇我」，聲言唔再出席愛港力擔任講者嘅活動。愛港力四面楚歌，今鋪點收科？
愛港力被指搗亂普選論壇。（資料圖片）
外人唔明白陳淨心唔緊要，但連昔日同路人愛港之聲召集人高達斌亦默認愛港力「佗衰家」，指佢哋係「戲班小丑」，陳淨心尋日即時喺社交網站發貼還擊，自稱屢遭愛港之聲抹黑，點名批評高達斌「真小人，偽君子」之餘，更貫徹「潮州辣妹」本色，動粗發炮「Ｘ街啦你高達斌！你才是真小丑！」火藥味濃到足夠令「神舟十號」升空喎。
前日嘅論壇由建制派嘅第二代舉辦，喺一場混亂後，佢哋都一口咬定係愛港力理虧。睇嚟愛港力愈嚟愈孤立，唔知點至捱得到政改嘅戲肉呢？
