政壇：鄉紳上京為堆填區訴苦

屏山鄉事委員會主席曾樹和同立法會議員梁志祥就同三十幾個新界人上京，向國務院港澳辦副主任周波伸冤。身為訪京團團長嘅曾樹和尋日見完周波後匯報情況，佢就話今次唔係告御狀，各個村代表主要都係向周波反映對擴建堆填區嘅意見啫。佢認為，如果只係擴建屯門同打鼓嶺堆填區嘅話，並唔足以容納本港嘅垃圾量，應該進一步研究點樣擴建埋將軍澳堆填區。社會上淨係要求擱置擴建將軍澳堆填區，對屯門同打鼓嶺堆填區附近嘅居民嚟講並唔公平咁話。

我哋亦都問過梁志祥，佢就話今次除咗講堆填區外，亦有提到新界人嘅土地權益、賠償、僭建同普選議題。新界人覺得政府將佢哋嘅土地納入郊野公園範圍，令佢哋損失成二百億元，政府應該賠償，而唔係好似依家咁處處向新界人開刀。

各種各樣嘅地區性問題，周波聽完之後，都係叫佢哋以談判嘅方式解決分歧，要配合政府施政。對於普選特首，梁志祥就引述周波話，選舉嘅方式同細節係要由港人嘅智慧同政府按人大嘅決定自行商定，但大家就唔好為反對而反對。簡單啲講，咪即係叫大家唔好搞咁多嘢，以和為貴。