計埋今次,王賜豪已經係第三次停牌。(資料圖片)

「同珍醬油」第三代掌舵人兼保良局前主席王賜豪因超速駕駛同衝燈,被運輸署下令停牌六個月,今次已經係佢第三次停牌。據講佢因身體抱恙,喺內地一間醫院留醫,尋日佢只係搵咗代表律師去法院聽取停牌令同埋交出車牌。

計埋今次,王賜豪已經係第三次停牌。(資料圖片)

王賜豪今年三月先喺九龍城法院打甩不小心駕駛罪,點知原來佢喺前年十月至上年十一月嘅一年多內,已因為四次超速駕駛同一次違例衝燈,畀運輸署扣咗十九分,雖然佢上年八月報名參加咗個駕駛改進課程,希望補番三分「應急」,但最後所扣嘅總分都係超過咗法定嘅十五分,無可避免畀運輸署下令停牌。

法庭原本上個月初已傳召過王賜豪,但當時佢搵咗公司代表到庭,解釋因病入院而缺席,更遞上醫生證明畀裁判官睇,要求將案押後,所以法庭將佢單案排到尋日,結果佢都係唔能夠親身到庭。控方尋日踢爆,原來王喺○三同○九年都先後有過停牌紀錄,所以今次已係第三次。

第一手消息請下載on.cc東方互動iPhone/iPad/Android/Windows Phone Apps