政壇：李文斌又添丁爆妻蝦碌
李何芷韻（右）再為老公李文斌（左）增添一個可愛寶寶。
仁濟醫院董事局前主席Edmond李文斌育有一對龍鳳胎，啱啱周日又添丁。身為保良局總理嘅李太Amanda何芷韻順利誕下六磅重嘅BB，係仔嚟嘅，頭髮濃密似足媽媽，一雙大眼就似足爸爸。
李何芷韻（右）再為老公李文斌（左）增添一個可愛寶寶。
再為人父，Edmond笑言今次淡定好多，但太太懷孕初期曾出現蝦碌片段，話說Amanda起初唔知自己有咗，有排突然作嘔作悶，仲以為食錯嘢，直至後期不適加劇，一搵醫生檢查，先知原來有咗四個半月，老公都笑佢烏龍。
李家再添一員，Edmond話期望B仔健健康康成長已足夠。咁阿仔叫乜名？佢話中文名會由爺爺李運強改，跟番族譜，英文名就跟大仔一樣，用A字行頭，取名Alain喎！三個夠晒數未？佢話到底生定唔生，未有時間同太太討論，一切順其自然喎！
