政壇：兩車泊立會葉國謙違規
設計圖片及對白
新民黨嘅立法會議員范國威早前被本報獨家揭發縱容前議員鄭家富濫用立會停車場車位，立會行政管理委員會之後仲開會討論事件，話日後會撥亂反正，跟番之前訂立嘅規矩，確保每位議員同時只可以喺立法會停車場停泊一架車，仲會用番原本就有、不過廢咗嘅電腦拍卡系統。
設計圖片及對白
泊議員位
泊訪客位
不過，行管會呢頭先決定嚴厲執法，嗰頭我哋就發現又有議員違規停泊多一輛座駕，今次竟然係行管會委員之一、建制派嘅葉國謙。我哋尋日去立法會停車場巡查所見，葉國謙兩架私家車同時泊喺停車場，不過一架就泊喺議員專用車位、另一架就泊喺訪客車位。兩架車都掛有中港車牌，一架泊東，一架泊西，唔知係咪博人睇唔到佢兩架車同時存在。
A字膊卸得就卸
葉國謙解釋，話由於佢其中一架車尋日突然壞咗，於是佢就叫司機將另外一架車揸去立會，再將壞咗架車送去車房維修，死撐話兩架車同時喺立會停車場嘅時間只有兩至三個鐘。佢仲話立會停車場係為議員服務，認為自己嘅做法完全無問題，非常理直氣壯，但就唔多講原則。擺明係「A」字膊，卸得就卸喇，唔知呢啲係咪就係叫「律己以寬，待人以嚴」呢？
其實喺立會停車場同時泊有兩架車嘅議員，唔止葉國謙一人，我哋不時都見到最少有另外兩位議員都同時泊咗兩架車，喺我哋揭發鄭家富泊霸王車嗰兩日，都曾經報道過，估唔到有議員仲可以咁聲大大，真係令人擰晒頭。一位議員只能泊一架車係規矩，議員有法不依，真係講唔過去，仲要係行管會成員添！
