官僚知法犯法 消防醜上加醜
公眾場合，一名大肚腩阿叔一面吞雲吐霧，一面大模廝樣亂過馬路，既唔顧形象，又當交通規則冇到，如果你以為佢係內地旅客，咁就冤枉同胞咯，原來呢位煙不離手嘅阿叔就係近排醜聞不絕嘅消防處處長陳楚鑫。
《好報》踢爆，陳楚鑫身為紀律部隊首長，竟然喺街頭搏命煲煙，逼其他途人食二手煙不特止，而且有斑馬線唔行，刻意亂過馬路，擺明知法犯法，你話咁嘅高官仲有乜形象可言吖。
處長帶頭違法，下屬自然有樣學樣，唔怪得消防處醜聞爆不停，衰嘢多籮籮咯。講到領導無方、管理不善，消防處長認第二，相信冇人敢認第一。有消防員踢爆，前任消防處長盧振雄話就話早已退休，但到依家仲佔用消防總部九樓嘅會議預備室，就算有人投訴，新處長一於關人個關，完全當冇事發生，問你服未。港府設有前特首辦公室畀離任特首使用，唔通消防處亦設有前處長辦公室？
叮，咁嘅管理水平，消防處有乜法子唔頻頻出醜吖。正如學者話齋，身為處長都唔守規則，公私不分，擅自改變會議室用途，幾難唔令外界聯想到消防處都係唔守規矩嘅部門。
講開又講吖，消防處唔守規矩當食生菜，早就見怪不怪喇。呢，各位仲記得前排消防處總部防火兒戲，自身難保，火燒後欄嗰單醜聞嗎？其實，呢啲只係冰山一角咋，本報記者揭發，消防總部好似無掩雞籠咁，任何人都可以自出自入，舉目所見，唔止天台堆放建築廢料冇人理，被視為滅火裝置心臟嘅「消防泵房」居然淪為「洗衣房」，入面堆滿雜物，七國咁亂，明顯違反消防條例喇。
消防官僚應做唔做，唔應做就亂嚟，講得好聽啲叫本末倒置，講得難聽啲根本就係倒行逆施。嗱，消防處監管不力，巡查求其，搞到危機四伏，事故頻頻，但講到打壓新聞自由就鬼咁積極，僅憑一封所謂電郵投訴，就即時高調派人踩上報館滋擾，最後證實投訴純屬子虛烏有，咁唔係倒行逆施又係乜吖！
預防勝於治療，防火首先由消除安全隱患做起，陳楚鑫其身不正，醜聞不斷，呢個最大嘅「安全隱患」唔消除，消防處隨時再爆大鑊嘅咋，叮！
