SUN搞作：少膽虫手記：公信倒數第壹
少膽虫為咗日後喺報界仲搵到口飯食，延續日日食千幾蚊lunch嘅卑微生活，向來唔敢喺度多談其他報紙。不過由於《商品說明條例》實施，首當其衝嘅梗係自詡公信第一嘅日月邪報啦，但係《爛果》都要檢視吓現行嘅廣告口號有無作大。因此淫賤黎又開集屍會，要求大家交口號意見。
集屍會集中一大班行屍走肉，沒精打采咁，自然又係少膽虫上位嘅時間：「少膽虫問過法律意見，《爛果》絕對名符其實，完全無機會犯法。所以話，腦細英明！」會上掌聲如雷。「不過，少膽虫喺呢件事上顧及到《爛果》無句似樣口號，得到腦細同意，希望大家每人即場交一句口號，交完先至准走。」會上立即死寂一片。
少膽虫見狀，仲唔打蛇隨棍上玩殘肥豪？於是即刻要佢答。點知肥豪口快快，就話：「淫黎教主，文成武德，千秋萬載，一統江湖！」淫賤黎大悅，同秘書講：「呢個好！快啲抄低佢！」少膽虫一計不成，又生一計：「你可唔可以學吓日月邪報咁露骨呀？但係唔可以犯法喎。」
肥豪冷笑一聲，淡然話：「人哋係『公信第柒』，我哋咪『公信不排除相信或者應該係第壹』囉。」
