Sun奇古怪：Sun潮語：勇武

每年書展開幕，都有人通宵排隊，擔櫈仔霸頭位。睇新聞見到當日第一個衝入會場嘅哥仔，目光如炬身手敏捷，非常「勇武」！呢種「勇武」精神，如果用喺爭取香港民主，可能我哋十年前已經有普選！

「勇武」其實已有幾千年歷史，喺《春秋．文子．上德》：「勇武以強梁死，辯士以智能困。」呢個「勇武」係勇士、武士咁解。「勇武」同時亦可作形容詞用，意思當然係「勇武威猛」。《漢書．平帝記》：「秋，舉勇武有節明兵法，郡一人，詣公車。」

今時今日嘅「勇武」主要係形容社會運動，指「勇武社運」或「勇武抗爭」。呢種「勇武」精神，係由近年興起嘅激進民主派所提倡，主張每次示威都要玩激啲去盡啲，輕則佔領馬路，再「勇武」啲就係衝破警方防線，食胡椒噴霧。

不過後來又有本土派學者經常將「勇武抗爭」掛喺口邊叫人去「勇武」，自己就坐喺屋企做鍵盤戰士，又有啲自稱激進派人士，大叫「勇武」，原來只係出書出漫畫搞舞台劇同網上罵戰，「勇武」呢個潮語就摻入咗些少貶義成分，變成一句反話。話你「勇武」，其實即係笑你係「鵪鶉」，講就兇狠，做就碌……

點都好啦！「勇武」唔係靠把口，始終都要靠拳頭。