政壇：田二少掃10部舊款黑莓自用
田北辰怕「黑莓」轉款後唔啱用，狂掃十部現有款式做存貨。
智能手機愈出愈多款，立法會議員田北辰卻獨沽一味只愛「黑莓」手機，認為佢處理文書夠快、夠方便。但呢隻牌子將改用輕觸式鍵盤，田二少唔想用新嘢，早前竟然一口氣狂掃十部依家用開嘅同款手機，等未來慢慢用。
田北辰怕「黑莓」轉款後唔啱用，狂掃十部現有款式做存貨。
田二少日前現身一個就職禮時用嘅係一部灰白色「黑莓」機，佢話因手指粗，篤鍵盤時好易篤錯隔籬，所以用機好揀擇。可惜「黑莓」逐步改用輕觸式鍵盤，為免將來冇機用，田二少年前已經大量入貨，一次過買咗十部用開嘅同款手機，用舊咗就換，依家已經用到第三部，仲有七部存貨。咁用晒存貨後點算？田二少答得風趣：「等到用埋嗰七部手機，我都退休啦！」
