政壇：金刀梁提貪湯耍太極

香港大學校務委員會主席梁智鴻（金刀梁）係大忙人，尋日要返診所工作，中午都約太太喺中環置地廣場一間餐廳撐枱腳，兩人共膳時雞啄唔斷，仲遇見三個朋友添！其後金刀梁同太太離開，佢哋行街時翹手，連搭扶手電梯，金刀梁都拖實太太，夠晒恩愛。公職多籮籮嘅金刀梁係「檢討廉政公署處理公務酬酢、饋贈及外訪開支制度程序委員會」成員，前廉政專員湯顯明在任廉署期間亂花公帑送禮、宴客及外訪嘅醜行令人髮指。我哋問起金刀梁跟進「貪湯」事件嘅進展，佢唔肯多講，淨係話委員會依家仲調查緊，會喺四個月內提交報告，把口真係密實過廉署。