政壇：政客書展搶風頭
設計圖片及對白
每逢書展，唔少成日見報嘅議員同政壇中人都會出書搶風頭，既可幫補收入，又可維持曝光率。尋日幾名議員不約而同落咗書展，喺攤位上搞簽名會或宣傳，立法會議員葉劉淑儀嘅教英文書系列就出到第三輯，而黃毓民亦為新書作宣傳，仲表演一邊食飯盒、一邊簽名添。佢哋都吸引咗唔少粉絲捧場，但同樣落力銷書嘅職工盟李卓人就閉翳囉，雖不至門堪羅雀，但同葉太比就遜色嘞！
設計圖片及對白
葉劉淑儀挾香港大學英國文學學士、美國史丹福大學雙料碩士之名，尋日現身會展同讀者分享學英文心得，吸引幾十人逼爆會展細細個會議室。葉劉將中學時期開始儲起嘅手寫英文學習卡公諸同好，話中五開始無論睇書抑或睇電視，只要遇到啲有用嘅英文生字或造句都會抄落嚟，畢業後加入政府，又會同英國人上司交流吓英文修辭。
鍵盤戰士拍烏蠅
毓民就話，連日都會落場走兩檔幫新書拉客，預咗簽名簽到手軟。阿人就笠上「馬頭」頭套，玩食字宣傳撐碼頭工人嘅新書。唔知係咪佢哋兩個冇大鑼大鼓張揚自己會現身，所以排隊攞簽名嘅人就唔及葉太咁多。
「鍵盤戰士」香港自治運動發起人陳雲亦銷新書，被問到有咩新招吸引讀者，陳雲只係一碌葛咁坐喺度話「冇呀都係喺Facebook宣傳吓」，鍵盤戰士想打幾隻字就有粉絲嚟買書攞簽名？唔怪得攤位靜英英。
更搞笑嘅係年年都幫政府各部門開檔賣書嘅政府新聞處，耗費公帑競投完個檔位又無心戀戰，只係收集各部門派唔出或者冇人要嘅實務守則放晒喺書展推售。唔怪得睇嘅人多，買嘅人少到唔見有，真係冇眼睇。
