生前出名,身後更出名,咁威水嘅港產明星除咗李小龍,搵唔到第二個。今日係李小龍四十周年死忌,全球各地有各種活動紀念呢位最早將中國功夫帶到荷里活並揚威世界,喺世人眼中幾乎同「中國人」畫上等號嘅一代武打巨星。

除咗美國、日本擁躉嘅紀念活動,台北有武術學員身着李小龍經典黃色功夫裝,喺街頭表演雙節棍;內地有李小龍遺稿新書發布會,亦有廠家推出「李小龍」品牌服裝,各自精彩,熱鬧非凡。

香港係功夫天王學習同生活過,初露頭角並一舉成名嘅地方,紀念活動規模照計點都有番咁上下啩。講起來真係丟架,原來只得一個「專題展覽」咁大把。至於市民和功夫迷望到頸都長嘅李小龍紀念館,成唔成到事都仲係未知數。

商務及經濟發展局局長蘇錦樑回應立法會議員質詢時話,同李小龍故居業主經過多番商討,未能就復修故居作為紀念館達成共識,現時對李小龍表達尊敬同懷念嘅理想方法,係喺香港文化博物館設置專題展覽喎。呢個名為「武.藝.人生——李小龍」嘅展覽今日揭幕,將展出六百幾件珍貴文物,會擺放五年。

港產官僚沉香當廢柴,一代巨星魂無歸處。呢批文物彌足珍貴,五年後如果紀念館仲未傾掂,甚至告吹,到時點算?唔通再塞番入貨倉,從此不見天日?

叮佢個鎯鎯!雖然李小龍故居唔係古蹟,但係對香港人有特別意義,呢個享譽國際嘅港產功夫巨星,代表咗武術嘅傳承,更代表香港嘅文化成就,佢嘅地位未來幾十年甚至幾百年都未必有人可以替代。港產官僚闊佬懶理,香港咁大,居然拖咗咁多年都搵唔到一處地方畀紀念館落腳,可怒也!

仲有吖,李小龍係「香港之光」,代表住一個輝煌嘅時代,唔單止可以宣傳推廣香港呢顆「東方之珠」,更可以為本港帶來巨大嘅旅遊收益,弊在港府捉到鹿唔識脫角,吊吊揈乜都唔做。呢嗱,人哋其他地方就唔同嘞,話做就做,有啲建造全球最大李小龍紀念館同世界最高李小龍塑像,有啲推出李小龍紀念郵票,總之百花齊放,呢啲咪叫牆內開花牆外香咯,叮!

凡眼不識真英雄,旨意港產官僚將李小龍威水史發揚光大,根本係緣木求魚盞嘥氣。計太一叮話齋,不如叫佢哋駕輕就熟,為「貪遍省港澳,歎盡海陸空」嘅貪曾同埋巧立名目篤公數歎茅台嘅貪湯,整番個「雙貪紀念館」仲實際喇,叮!

第一手消息請下載on.cc東方互動iPhone/iPad/Android/Windows Phone Apps