SUN搞作：少膽虫手記：爛果教育
肥豪、fing春蘇嗰幾個靠擦腦細鞋上位嘅契弟，三不五時有意無意行過嚟少膽虫個位度，欲言又止，好似有便便屙唔出咁……見到呢兩個「忍樣」，少膽虫真係想嘔，鬼節臨近，為咗快啲送走瘟神，少膽虫終於做開金口嗰個，關心吓兩個「好下屬」。
「狗噏24好高點擊率呀，我哋諗出嚟o架！」、「腦腫可以畀多啲自由虫仔虫女嗎？」少膽虫知道，呢啲只係佢哋嘅激將法，想逼條虫落台，就好似強國貪官話有佔中就會出坦克、花卵功話天滅邪黨一樣，喺一種語言偽術。於是少膽虫就嚟招「虫仔耍太極」，玩吓啲入世未深嘅傻仔。「十年前，淫黎話我哋賣紙會賣得多過正義傳媒！依家日日賣剩嘅紙，我哋會拎去邊？」
「拎……拎去通渠囉。」肥豪畀少膽虫突如其來嘅質問嚇親。少膽虫唔放過呢個實施「蟈民教育」嘅機會，「得個講字係無用，數字係唔實際嘅，Do you know what is the meaning of obey?」小朋友大概好驚，即刻走夾唔抖。
