呢度講嘅「水分」，係指 「吹水成分」，即係指一啲事情或數字真確性嘅比例。如果形容一個人講嘢「水分」高，即係話呢條友講嘅可信性極低，相反如果一個人講嘅或者一件事「水分」低，甚至係無「水分」，即係話件事嘅可信性高。另外，亦都有人用「水分」嚟指「屈水成分」，又即係「呃錢成分」。例如有啲產品，聲稱食完曉飛天嘅，就可稱為「高水分」產品，好彩新修訂嘅「商品說明條例」尋日終於生效，有助打擊一下呢啲「高水分」產品。

早幾日喺有線電視睇到一則報道，發現香港原來有進口洋垃圾，有用嘅嘢就賣畀回收商，無用嘅就丟去堆填區，入口垃圾嘅數字仲相當驚人。咁搞法，香港唔知要起幾多個堆填區先夠。最弔詭嘅係，當記者研究政府所公報嘅數字，發現原來同現實情況有好大出入。記者即時拎啲數字去質問環境局，政府當然死口唔認，仲話記者嘅資料係錯。最離譜嘅係有個環境局嘅政治助理，喺自己個facebook話有線電視呢個報道偏頗，即刻被狂轟到收回言論。呢啲垃圾加埋啲膠垃圾，真係全港十八區起晒堆填區都唔夠擺！不過近年香港政府公報嘅數字，唔知係咪學埋「鄰近地區」啲衰嘢，數字「水分」真係愈來愈多！

除咗數字同事情可以高「水分」外，人當然可以用「水分」高嚟形容。有啲人吹水唔抹嘴，講嘢冇句真嘅人，講啲嘢當然蘊含豐富「水分」。唔使講邊個，就睇阿邊個邊個咪知囉！仲問邊個？梗係成日被人叫大話精嗰個啦！

第一手消息請下載on.cc東方互動iPhone/iPad/Android/Windows Phone Apps