政壇：搞搞政：飯盒會坐正馮檢基忽然積極
設計圖片及對白
泛民主派議員每周五中午都會喺立法會舉行飯盒會，以便互通消息同協調立場，過往一般由較中立同夠分量嘅議員擔任召集人，今屆立法會就改為每年換人一次，等唔同黨派代表可以輪流做，嚟緊一年召集人係民協嘅馮檢基，佢將會接替做滿一年嘅劉慧卿。阿基今次升呢主持開飯儀式，卻畀人插佢過去寧去健身，都缺席飯盒會，呢次坐正，阿基都急急話周五一定會開會。
設計圖片及對白
不過，有泛民議員爆料，話阿基以前經常缺席飯盒會，質疑佢有無資格變身召集人。咁阿基以前唔開飯盒會，究竟去咗邊度呢？原來係去咗灣仔某間大型健身室健身。佢話同健身教練約來約去，都只得周五中午嗰段時間有空檔，健完身後想趕返立法會開飯盒會，可惜趕到去都已經散會。升咗呢做召集人後，阿基答應會約過第二個時間去健身，周五必定會準時開會喎。
阿基同佢所屬嘅民協過往標榜「又傾又砌」，政治立場比白鴿黨更溫和，飯盒會嚟緊一年預計會傾政改同佔領中環等議題，擔唔擔心會好難同班激進泛民合作呢？阿基強調，做召集人只係負責主持會議，最緊要公正持平，個人立場唔會有影響喎。咦，咁講法係咪代表盒飯會唔使聽民協嘅意見呢？
