政壇：鄭錦鐘日簽千個名
鄭錦鐘（右）同優秀學生輕鬆對談。
中學文憑試啱啱放榜，保良局尋日就向所屬中學考獲三科5**以上嘅考生頒發獎學金，共有十九位男女學生獲嘉獎。保良局主席鄭錦鐘（Eric）、副主席梁安琪及前主席顏顏寶玲等抽空為同學仔打氣。Eric自爆出身徙置區，後來憑努力取得今日成就，勉勵同學不必在意出身寒微，又話如果將來有在座同學做保良局主席就好喇！
鄭錦鐘（右）同優秀學生輕鬆對談。
Eric有感而發，係因為考獲五科5**嘅李俊穎同學話自己出身屋邨，曾經迷惘如何同其他社會地位較高嘅同學相比，Eric咪以自己嘅經歷勉勵同學仔囉！不過，Eric都呻呢個主席唔易做，淨係簽名平均每個月都要簽三千個，試過最誇張嘅一次，係一日簽一千個名，真係簽到手軟。點解要簽咁多名？咪因為保良局瓣數多，文件及支票多多，幸好佢勤做手腕操，如果唔係簽到勞損都唔出奇。
賭王四太梁安琪亦喺百忙之中抽空到場，但佢忙到不得了，亮相一陣就趕住走，話要返去澳門喎！至於顏顏寶玲就代表「保良局顏禧強伉儷獎學金」，向成績最好嘅八位同學每人頒發一萬元獎學金，事關獎學金係以佢同埋丈夫顏禧強名義捐助。
