政壇：蔣麗芸立會年結爆金句
設計圖片及對白
暑期到，學生哥已經開始享受悠長假期，立法會議員亦開始放暑假，一眾議會新丁總算捱過懵懂嘅一年，建仔新丁蔣麗芸（Ann）出身商界，尋日佢回顧過去一年嘅議會生涯，自言起初好似失明人咁到處摸索，之後先喺泥濘谷底爬起身，講到自己入議會好似玩緊泥漿摔角咁。佢仲話，因為自己嘅「失明」，搞到元秋女士畀人罵咗一陣。呢句說話真係值得斟酌，似乎人哋鬧嘅係喺議會獅吼、被人喻為政壇元秋嘅阿Ann喎，同元秋本人有關咩？
設計圖片及對白
摸索期如失明
阿Ann尋日喺社交網站為首年議會表現做個總結。佢開宗明義話選民一票係投啱咗畀佢，自言啱啱做議員時好似失明一樣到處摸索，仲害元秋女士被人鬧咗一排，直到今日，佢總算從泥濘谷底爬起來，雖然身上泥巴仲未完全乾透，但相信終會慢慢脫落。
阿Ann話從商界跳到議會，畀咗佢全新體驗，由開始時嘅彆彆扭扭，到依家灑灑脫脫開始融入，佢承諾未來一定會更努力做一個好議員，證明曾經投票畀佢嘅選民係啱嘅。
過去一年，阿Ann表現真係令人印象深刻，首先力撐因國教事件備受批評嘅教育局局長吳克儉，高聲反問：「使唔使炒咗佢？」旋即一炮而紅，其後到特首梁振英（CY）處理僭建事件，阿Ann又出動力撐，仲爆出：「男人結婚周年紀念日都記唔清，何況個花棚？」結果又成金句。其後，佢又開始加入同泛民主派駁火行列，更曾睇準時機以新丁議員身份，要求罷免人民力量陳偉業同獨立議員黃毓民，儘管最終有關議案遭到否決，但阿Ann嘅表現喺一眾新丁中真係好突出。
既然已經從泥濘中爬出嚟，到立會十月份復會之後，睇怕阿Ann都少不了又有吸引視線嘅新動作。
