阻街店舖應重罰 阻碇官僚須整頓
店舖阻街唔止霸道，仲會對行人構成危險，梗係要取締啦。不過講到阻碇，有一樣嘢更加要盡快移走。乜嘢？咪就係尸位素餐嘅失職官僚囉！違規店舖借頭借路侵佔行人空間嘅問題存在多年，問題不但無改善，反而變本加厲，唔先清理咗班大食懶官僚，點樣撥亂反正呀？
點解太一叮咁肯定係執法人員大食懶？梗係啦，有申訴專員指證，唔通仲有假咩。嗱，申訴專員公署係咁講嘅，署方經常收到有關店舖阻街嘅投訴，包括貨物長期佔用行人通道，商戶喺公眾地方非法擺賣，同埋商戶搭建違例構築物等等，而從投訴個案及日常觀察所見，相關部門對問題嘅規管及執法欠缺成效。失職官僚無話好講啦！
錯就要認，打就要企定。申訴專員宣布，基於店舖阻街問題持續，且有變本加厲之勢，所以會展開主動調查，針對花店、藥房同蔬果店等阻街情況，探究及分析原因，提出改善建議。至於涉嫌失職嘅部門大家熟口熟面，就係食環署、地政總署、屋宇署同民政事務總署呢幾個蛇王榜常客。
唉，店舖長期公然阻街，執法官僚居然熟視無睹，咁不可思議嘅離奇現象的確有必要查一查。之不過咁，查完又點呢？店舖阻街大大話話講咗十幾年，太一叮都叮到手軟，但係問題一路以來有無改善吖？執法部門有無反省吖？若然執法者繼續有法不依，有貨不移，就算申訴專員提出一萬個建議都無用o架，店舖阻街只會永遠橫行霸道！
當然啦，店舖阻街禁之不絕，除咗因為部門執法不力，亦有另一原因，就係刑罰太輕，根本起唔到阻嚇作用。嗱，本報記者尋日巡查重災區旺角花墟一帶，發現唔少街道至少半條行人路被貨物阻擋，部分貨物更加放出行車道添，猖獗程度簡直路人皆見。區議員批評，唔少店舖都係明知故犯，罰款當交租，促請政府加強罰則以儆效尤。
啱o架，治亂世用重典，治亂象亦不妨加重罰款喎。高官高薪厚祿都貪得無厭違規僭建啦，何況家陣舖租寸土尺金，如果店舖每月交少少罰款就可以肆無忌憚一路擴展經營空間，難怪僭建成瘋，只係瘋狂僭建嘅唔係掘深咗嘅地下王宮，而係擺出咗嘅街邊貨倉咁解。
一句到尾，禁而不止，則刑罰侮。缺德商人同失職官僚一樣，唔受重罰唔知悔改，港府一於雙管齊下，一方面整頓失職嘅阻碇官僚，一方面重罰缺德嘅阻街店舖，咁問題或者有機會撥亂反正，叮！
