城中鏡：純官鬥氣收跑馬地起樓
鄭家純鬥氣建議，收番跑馬地馬場發展。
佔地達一百七十公頃嘅粉嶺高爾夫球場近日成為城中焦點，唔少人促政府收番。新世界發展主席鄭家純（純官）日前出席一個活動時，承認自己擁有粉嶺高球會會籍，仲經常去打波添，對於有人話要收番高球場笪地起屋，佢好勞氣咁提出反建議話，跑馬地馬場夠晒闊落，不如又收番嚟起樓啦！
鄭家純鬥氣建議，收番跑馬地馬場發展。
純官話呢個球會已有百幾年歷史，好多代人都享用緊呢個設施，一路相安無事，依家因為香港搵唔到地方起樓，就話要收番，真係講唔過去。佢好勞氣話，市區夠有好多花園地啦，唔通又收番嚟起樓？佢愈講愈激氣，鬥氣話點解唔收番跑馬地馬場嚟發展呢？身為本港大地產商之一，純官好認真話，城市發展要顧及平衡，除咗住宅之外，仲需要其他設施。
