王賢訊與太太朱穎詩攞住佢哋一手一腳炮製嘅繪本小說，笑得好燦爛。
暑假嘅城中盛事一定少不了規模愈來愈大嘅書展，尋日展場內外只有一句「人嘅海洋」可形容。仁濟醫院副主席王賢訊與太太朱穎詩一手一腳炮製嘅繪本小說《南山七小福》，今年喺書展中推出第四期，佢哋兩夫妻尋日全力以赴喺展場打點，希望呢本書成為本地兒童讀物新經典。王賢訊仲取笑太太對於今次書展十分緊張：「佢話佢緊張到好似生仔咁。」
王氏夫婦尋日齊齊現身書展，親力親為推介、賣書，見證創作之後嘅收穫。王賢訊落足力，佢開心咁話，各界對本書嘅反應好理想，仲有小朋友搵佢及設計師簽名添。佢話：「我哋今次書展準備咗限量500套的合訂本及限量百多隻公仔，除咗出書外，稍後更會推出動畫，推出第七期後便會着手做。」
書展之外，佢哋仲有更大目標，王賢訊透露，希望將此書打入國際市場：「忙完書展之後都仲要忙，想畀啲外國買家睇吓，所以同設計師諗緊推出更多product，老婆仲會幫手翻譯英文版，希望打入國際市場。」
第一手消息請下載on.cc東方互動
