城中鏡：東華簡約飯堂設宴陳婉珍惜食
陳婉珍（左）好投入東華事務，佢親自設計嘅紅色心形領呔，總理黃業光都捧場。
各大慈善團體早前順利換屆，陸續舉行傳媒聚會，尋日輪到東華三院。主席陳婉珍（Ina）破天荒喺東華三院黃笏南中學設宴，將學校變身成為別開生面嘅簡約飯堂，並搵來旗下社會企業iBakery廚師，炮製精緻美味又輕巧嘅西餐，繼續貫徹其「惜食」宗旨。
陳婉珍（左）好投入東華事務，佢親自設計嘅紅色心形領呔，總理黃業光都捧場。
東華三院總理陳蕙蘭（右）及區宇凡見證東華三院黃笏南中學重建前一刻。
東華三院旗下有唔少教育機構，位於九龍塘嘅黃笏南中學，係該院史上首間創辦嘅中學。呢間逾五十年嘅校舍，日前獲政府撥款二億多元重建，於下月展開工程。Ina於是靈機一觸，乘機帶大家一齊告別舊校舍，佢話校園嘅重建，標誌着東華教育史上嘅里程碑。今年中學文憑試，該校有五位考生考獲六科五*或以上佳績，約八成半學生達入讀大學資格，Ina都話令人鼓舞，會繼續興學育才。
設計桃紅呔顯愛心
同場仲有唔少總理出席，如黃業光、區宇凡等，佢哋不約而同打咗條桃紅色嘅領呔，呔上有整齊排列嘅粉紅色心形圖案，非常搶眼。原來領呔係由Ina親自設計，用上佢至愛嘅桃紅色，心形則代表東華人無限愛心。Ina仲另外設計咗兩款藍色呔，點知大家都特別鍾情紅色呔，仲話每逢與官員會面，都必以紅呔上陣喎。
講到東華今年試辦嘅天水圍天秀墟生意一般，Ina話其實入面都有賺錢例子，但唔少商戶欠缺營商經驗，未來會諗計增加墟市吸引力，例如周末舉辦嘉年華及表演，並引入不同類型商品，有信心墟市會愈辦愈好。
