SUN搞作：打橫嚟講：書展焦點：政治＋謊言
外諺：「有乜嘢人民，就有乜嘢政府。」此語來到香港，變成：「有乜嘢政府，就有乜嘢市民。」家陣，港人見別人撒謊，都好鬼包容，習以為常到好似呼吸般自然，不覺一回事矣！
每年一度的香港書展，雖然主辦單位香港貿發局超級弱能和失敗，但書展呈現的「民情」，仍值得關注的。
社會有甚麼讀者，市場就有甚麼出版物，從市場學看，那是供求的折射，但從文化觀察方面看，該是大眾意識的反映。
今年，香港書展的焦點，落在「政治謊言」的論述裏，不少出版社以編製「政棍偽語」的書作主打，例如，有《謊言治港》、《拆穿官場語言偽術》、《膠噏》……等多款批判時政屁話的新書，可見「乜嘢政府言論，便有乜嘢社會回應」囉！
最近的三百六十幾日裏，整個香港空間，充斥着「開誠布公」之廢柴庸官的妖言，若非「你願講我願聽」、「我會認真虛心聆聽你的意見」，就係「我同你哋一樣好有感受，我感受到你的感受」，又或「我已聽到你哋嘅聲音」，之不過，最後，呢啲「迎難而上」、「穩中求變」、「比白紙更白」嘅班子團長，會話：「我竭盡所能，尊重社會方方面面嘅表達意見自由」，「但係，我真係無新回應、無新評論、無新補充，No comment……」
活在一個鬼話連篇的魑魅異域，長久下去，連自己都唔知係人定係鬼囉！究竟邊狗個，害到我哋咁嘅呢？真係No comment？
彭志銘
次文化考古學家，對城中潮語有深入研究，博徵博引，廢官廢人行埋一邊。
歡迎add我facebook一齊(目及)實政府
