「燃亮我意志，鼓起我勇氣，前面去再創傳奇……」當少膽虫聽到呢首TBB《衝上暈精Ⅱ》主題曲，真係不期然回想起當年。有人話，少膽虫手記好易寫；又有人話，少膽虫純粹仗住淫賤黎，先至有今時今日《爛果》腦腫嘅地位。其實少膽虫平時寫嘢係短啲求其啲，但係勝在字字血肉，全部係擦鞋的辛酸。譬如呢排淫賤黎為救亡，搞咗個「狗噏24」，淫賤黎一如既往，叫少膽虫入房「食吓飯，傾吓偈」。

淫賤黎拎住樽鹽，呆望窗外。少膽虫戰戰兢兢咁問：「腦細，你又有咩好似Sun搞作咁好嘅新搞作呀？」淫賤黎回過神，話：「唔得，個節目要剪布。」少膽虫即刻亂答：「乜娜姐仲係着得太多布咩？得得得！我即刻搵人剪多啲！哎呀！」講講吓，少膽虫額上已中鹽樽，痛到想喊。「少膽虫，你唔好以為好清楚我脾性先得o架！我唔係嗰啲下下都要灑鹽花嘅人！」淫賤黎怒斥，少膽虫卻真係滿臉鹽花。

「對唔住腦細！咁腦細意思係？」少膽虫弱弱地問。淫賤黎連珠炮發，娓娓道來：「哼，嗰條醉酒佬作家係咪你請番嚟？依家佢想同我鬥口齒不清定係神志不清呀？仲有嗰個咩鬼黐飲黐食作家，淨係識喺度笑，仲要一味係對住娜姐笑淫淫咁！」少膽虫心中一片澄明，原來係腦細呷醋！「腦細唔使驚，下次搵埋少膽虫做嘉賓，幫你當住觀眾面教訓佢！」少膽虫深明鋪定路上位之必要。

「下次？」淫賤黎指住電腦鏡頭話，「依家做緊直播啦！我狗噏廿四當秘笈，你做咗壹全霉咁耐，都唔知官姓乜？」

第一手消息請下載on.cc東方互動iPhone/iPad/Android/Windows Phone Apps