政壇：出櫃慢必想捐血食檸檬
慢必被拒捐血，佢直指紅十字會嘅要求落伍，希望佢哋檢討。
立法會尋日舉行一年一度捐血日，唔少議員都有去捐血支持，當選後承認「出櫃」嘅人民力量陳志全（慢必）都步入捐血站表示想捐血，紅十字會職員叫佢先填問卷，包括「有否與感染愛滋病病毒的人發生性行為？」、「有否接受金錢與人發生性行為？」「如果你是男性，有否曾經與另一名男性發生性行為？」慢必睇完問題後諗咗一陣，喺最後一題嘅「是」一欄打咗個剔號。
慢必被拒捐血，佢直指紅十字會嘅要求落伍，希望佢哋檢討。
幾分鐘後，紅十字會職員話佢屬於高風險一族，拒絕佢捐血。慢必要職員打電話向紅十字會醫生查詢，醫生回覆一樣，但就話該會正檢討有關程序，在此之前，會拒絕同類人士捐血。慢必仲話，細個讀書時都有捐過血，原本諗過尋日講大話，但最後都係唔想呃人，點知因而食檸檬。
尋日除慢必外，漁農界何俊賢同法律界郭榮鏗都被拒捐血，因為佢哋曾喺九四至九五年瘋牛症肆虐期間喺英國居住，血液樣本唔符合世衞標準而被拒捐血。
