政壇：勞福局常秘原來係樓王

根據公務員投資及權益登記資料，譚贛蘭喺今年六月初申報持有七個物業。佢喺香港唔止港島區有一個自住、三個出租嘅物業，喺倫敦同中山亦都有屋住、有租收。 譚贛蘭喺倫敦嘅兩個物業當中，其中一個仲報稱裝修緊，睇嚟係譚贛蘭嘅新「獵物」都唔奇。就咁睇，譚贛蘭呢位收租婆每個月嘅收入都幾和味。

黃鴻超六物業排第二

持有物業數量僅次於譚贛蘭嘅常秘，就有公務員事務局嘅黃鴻超。佢亦都喺香港、新加坡同倫敦三地共持有六個物業，當中除咗喺中環同北角嘅兩個係自用外，其餘都係用嚟收租嘅。不過六個物業中，其中四個佢都喺只擁有一半嘅業權。商務及經濟發展局工商及旅遊科嘅常秘黃灝玄亦不甘示弱，喺港島同倫敦都各持有兩個物業。

有人幾個物業喺手，亦有人「身家清白」。根據資料，商經局通訊及科技科常秘何淑兒、政制及事務局常秘張琼瑤、食物及衞生局常秘（衞生）袁銘輝，同埋海關關長張雲正都係報稱冇持有任何物業嘅。

同房屋土地政策有關嘅決策局中，發展局常秘韋志成同運輸及房屋局常秘栢志高都係報稱擁有一個物業咋。