不在其位霸車位 鄭家富貪婪成性

大家或者會問，鄭家富唔係上年已經卸任議員職務咩?無錯，鄭家富已經唔係立法會議員，但係佢仍然長期霸佔立法會停車場兩個車位，所以至有問題囉。嗱，唔係冤枉佢o架，尋日佢現身泊車時，被本報記者當場捉到正，人贓並獲，圖文並茂，吟詩都吟唔甩呀！

鄭家富做議員時滿口讕言，無做議員一樣諸多狡辯，佢聲稱自己係新民主同盟立法會議員范國威嘅義務法律顧問，一個議員有六個泊車證喎。叮佢個鎯鎯，唔怪得鄭家富花名叫「冚家富」啦，按照佢嘅邏輯，一人當選，冚家富貴，阿貓阿狗求其加個銜頭叫「義務法律顧問」，即刻可以公然佔用立法會車位，咁仲有王法嘅？再講吖，立法會規定每位議員只能佔用一個車位，鄭家富唔係議員而佔用車位，本來已經夠晒離譜，而且仲要超泊「一箭雙雕」，唔係無恥又係乜呀？

咪話太一叮踢爆，鄭家富獲范國威「贈送」泊車證佔用立法會車位，唔係因為佢係所謂義務法律顧問，而係政壇自己友至真。係人都知，鄭家富舊年力撐范國威參選立法會，今日有人得償所願做咗議員，梗係要投桃報李啦。嗱，無恥政客配唔配稱為尊貴嘅立法會議員唔敢講，不過立法會車位價值不菲就毋庸置疑，中環金鐘一個車位閒閒地幾千蚊月租，鄭家富一人長期霸兩個位，即係每個月慳番唔少錢，條數點計先？咁算唔算收受延後利益先？

所以話，江山易改，本性難移。鄭家富做政客時不務正業，一味抽水，家陣唔做政客，一樣貪得就貪，一味掠水。早前之嘛，七一遊行人山人海，佢間證婚公司居然攝位博宣傳，為遊行人士提供所謂九折證婚服務，擺明抽水兼掠水，簡直比保皇黨嘅「蛇齋餅糉」更加低莊。咦，唔通佢嘅證婚生意真係咁難撈，搞到連泊車費都畀唔起？定係人心不足蛇吞象，過氣政客貪婪成性一心搵納稅人笨呀？

講開又講，鄭家富其身不正，醜聞多到佢兩部車都裝唔晒。佢先後擔任立法會交通事務委員會副主席及主席，又係執業律師，居然被揭發超速駕駛，仲要無交罰款，繼而缺席聆訊，搞到要向市民公開道歉，並以書面認罪，瘀到爆。唉，鄭家富呀鄭家富，幾時你至會行正途呢？叮！