SUN搞作:打橫嚟講:又見升中小朋友哭了!
每年,這段期間,升中派位放榜日,總見到家長與學生哭哭啼啼的場面。
每當見到小朋友為升學阻滯而淚流披面,我就不期然地火都嚟埋!
呢個香港廢柴政府,仲要廢到何時呀?日日唔係話人破壞金融發展,就話先要處理好民生事務,才講第二樣;但家陣,任何乜叉政績都無,除咗講大話呃人之外。
一個社會最寶貴的資源,不是埋在地下的能源礦石,而係地上面的人才。
十年樹木百年樹人。要培育出色的人才,冇番三幾代人的積極和心血,就咪使旨意;但要破壞拆毀前人努力的成果,則話都冇咁易,只要多一兩件廢中之廢的「吳得掂」這類教育局局長,便足矣!
英治時的香港教育,被批評為殖民地式填鴨,全無可取之處,可笑的是,依家,自詡當今社會精英的一群,誰不是在此飲英人奶粉大的呢?再睇吓─回歸後,港人自立啦!又做出過乜嘢好事吖?
吳得掂庸廢局長之前,戡禍香港教育的,還有羅范、李國章、孫明揚和梁錦松,貪曾煲呔當然更是罪魁禍首啦!呢班人咪以為除下官帽,就可以拍吓籮柚閃走,當冇件事!上天係會開下file,慢慢同你哋計數,走唔甩的!
香港教育制度之不堪,其設計就是不想呢度有精英產生,最好全部都係弱能無腦、聽話聽教,等蛇齋餅糉的一群奴才!便於控制也!
彭志銘
次文化考古學家,對城中潮語有深入研究,博徵博引,廢官廢人行埋一邊。
歡迎add我facebook一齊(目及)實政府