政壇：梁紹安行善盼代代相傳
施家殷（左起）、韓世灝同羅永順，兄弟班拍住上服務社會。
九龍樂善堂主席Johnny韓世灝月前同地產商合作成立食物銀行，以天水圍同將軍澳做試點，派發食物券畀市民換取新鮮食物，為期半年嘅計劃預計有五百個家庭受惠。
施家殷（左起）、韓世灝同羅永順，兄弟班拍住上服務社會。
梁紹安（中）鼓勵大仔俊鴻（右）同細仔德鴻做善事。
樂善堂早前舉行一個慈善首映活動，Johnny同副主席羅永順、Clifford梁紹安、施家殷兄弟班齊現身。曾喺英國劍橋大學研究腦退化症嘅Johnny話，早年已意識到社會人口老化加劇，所以加入咗該堂後，逐步推行連串針對長者嘅服務。佢話一般食物銀行嘅資助係暫時性同以罐頭、乾糧為主，老人家同小孩長期食用容易營養不良，所以該堂設立嘅食物銀行，會鼓勵市民換取新鮮食物，食得健康，醫生都睇少啲。Clifford帶埋大仔梁俊鴻同細仔梁德鴻出席活動，佢加入該堂已近十年，已故父親都服務過該堂，將來會叫埋兩個囝囝加入，將善心代代相傳。
