政壇：大花膠陪高佬賢成長
何俊賢左手塊大花膠嘅「膠齡」，同佢一樣有三十四歲。
勢估唔到立法會漁農界議員「高佬賢」何俊賢，將四塊大花膠帶埋入立會辦公室。唔通佢諗住肚餓時用嚟醫肚？
何俊賢左手塊大花膠嘅「膠齡」，同佢一樣有三十四歲。
高佬賢解釋，呢幾塊大花膠有成二十幾三十年歷史，當中好似佢個頭咁大嘅「鰲膠」更加同佢年紀一樣咁大，都係由何媽媽喺佢出世當年購入，陪住佢一齊長大成人，根本就唔捨得食咗佢哋。如今佢進身立會議員，就順理成章攞咗幾塊大花膠擺喺立會，好似啲公司開張大吉時例必有幾塊「鎮店之寶」咁。
佢仲話立會對上兩個月先後遭逢火災同水劫，初時佢都以為自己間房啲嘢會畀啲水浸濕晒，所以當佢返辦公室第一件事就係要檢查花膠有無被浸濕，因花膠一浸濕咗就會變味，反而啲電子產品買晒保險就唔使驚喎！
