政壇：星爺倡大嶼山起樓
設計圖片及對白
政府依家打鑼咁搵地起樓，希望可以加快基層「上樓」，而近日推出新界東北發展計劃再次成為焦點新聞，政府就話呢個係「強化版」，但係因為擱置發展坪輋同打鼓嶺，被坊間嘲為「縮水版」，爭議不絕。不過，立法會金融界議員「星爺」吳亮星就認為，發展新界東北當然重要，但政府唔應該只將眼光放喺新界東北，其實香港仲有好多寶貴土地一直曬太陽，大嶼山就係一個例子喇！
設計圖片及對白
星爺話每次揸車過完青馬大橋轉左行，見到大嶼山咁多靚地，成十幾個山頭咁多，如果只用嚟做郊野公園，實在太浪費，因為佢發現冇乜人去大嶼山，所以佢話應該將個山頭剷平。吓！星爺想搞現代版「愚公移山」？講笑啫，佢繼續講，將啲山頭剷平，然後效法九肚山模式發展低密度住宅，佢估計該區完全發展後，最少可以建立到一萬個單位，咁政府就唔使周圍搵地啦！
促建低密度住宅
早前先發生有牛隻被車輛意外撞死，如果發展大嶼山，咁啲牛牛點算呢？星爺話唔使咁驚，雖然大嶼山啲牛仲多過人，但啲牛唔會JR（司法覆核）政府o架嘛，所以叫政府唔使驚咁多喎！
星爺咁都講得出口，相信想買樓嘅市民應該多謝佢，但興建低密度住宅嘅樓價肯定好貴，普羅市民係咪負擔得起都成問題。再講，如果寧願起樓都唔使理牛牛，咁政府應該首先剷平粉嶺高爾夫球場先，咁就叫公平喇。不過，牛牛冇啲富豪咁惡，唔知畏首畏尾嘅政府敢唔敢出手呢？
