追稅一毫子 庸官自擾之

唔係太一叮亂噏o架。話說地政總署近日頻向大埔詹屋村江庫花園業主發出「追殺令」，追收遠至十九年前嘅地稅，最少涉及四個地段嘅業主。本來呢，欠稅還錢天經地義，但十九年前嘅欠稅拖到今日至追討，已經夠晒匪夷所思，更令人莫名其妙嘅係，涉及款項居然只係一毫至四毫幾，你話係咪無厘頭吖？

有位鄭小姐五年前購入江庫花園一單位，一直按時繳交地稅，冇拖冇欠，點知近日突然收到地政總署發出嘅「催繳通知書」，指其單位所在地段於九五至九七年期間尚未清繳地稅，涉款兩毫四仙，信上顯示發單年份為一○年。正如業主話齋，九五年嘅地稅，一○年發單，一三年催交，十九年來都唔知轉過幾多手業主，港府咁做仲有冇離譜啲吖！

講到離譜，咁都未算吖。鄭小姐嘅單位所在地段共有三個業權，即係話每個業權平均被追討八仙地稅，而且仲係十九年前欠落，簡直係天下奇聞。唉，今時今日寄封本地平郵信件都要一元四毫喇，地政總署為咗追討幾毫子地稅，又要寄信，又要勞師動眾，條數究竟點計o架！

除咗呢位鄭小姐外，該村最少仲有三名業主近日亦接獲同樣嘅「催繳通知書」，其中一人被追收嘅金額只有一毫，另兩人則被追收四毫。最好笑係，有位被追討四毫地稅嘅業主費事煩，本來諗住透過繳費靈支付，點知繳費靈唔接受一元以下繳款，結果索性繳夠一元，一於益政府。

對於咁離奇兼荒謬嘅事，當局又點講呢？地政總署職員話喎，政府有權追討欠款甚至收回業權。至於點解拖咗十九年至追討零碎欠款，當局就完全冇解釋。又難怪嘅，咁無厘頭嘅嘢叫佢哋點解釋吖。

港產官僚不務正業，一啲都冇講錯o架。本港地政亂象多多，非法佔用官地有之、擅自改變土地用途有之，甚至有人違反土地契約將工廈當作寵物焚化爐，地政總署一於闊佬懶理；反而對十九年前嘅零碎地稅咁緊張，收收埋埋都唔夠寄封信，問你服未。正如有的士司機多收五毫子車資而被告上法庭，而貪曾至今仍然逍遙法外，港府不嬲都係倒行逆施嘅喇！大事做不成，小事做不好，擾民之事層出不窮，呢啲咪就係港產官僚嘅特色囉，叮！