SUN搞作：少膽虫手記：壹副賊相
少膽虫同大家好耐無見，唔好以為《爛果》好多嘢忙。有睇開本欄嘅人都知，少膽虫每日嘅工作，就係使幾千蚊食個lunch再話一啲旁門左道懶係知識畀讀者知，邊度會忙？少膽虫忙嘅唔係做腦腫，而係幫淫賤黎做王安石。
事緣淫賤黎流住口水咁搵少膽虫，想話搵人去改革壹全霉。由於壹全霉改革史同壹全霉蝕錢嘅紀錄一樣咁冗長，少膽虫直接話：「唔好再空口講咩改革喇，我哋呢個時代，只需要一個強人、一位英雄，去扭轉呢個世界。」少膽虫循循善誘：「你要嘅，只係一個好似少膽虫咁信得過嘅人，而唔係肥豪嗰啲油頭粉面。」
結果由嗰日起，少膽虫就負責打骰。順住淫賤黎崇洋媚外嘅心態，少膽虫知道美國有份報紙唔請攝記，全部靠記者用iphone影相，即刻頒布第一項變法：炒攝記。
不過，改革總係會遇到保守人士反對，人人都好似要對付商鞅咁，要將少膽虫分屍。但係少膽虫不甘於作法自斃，於是不顧重重阻撓、毅然果斷地推出第二項變法：收回第一項變法。
至此，少膽虫推出兩項變法，壹全霉都未見起色，於是放手一搏，推出第三項變法：竊相。《孔乙己》都有話，讀書人做嘅唔算偷，何況孔乙己竊書，人哋真係無咗本書；我哋壹全霉竊相呢，人哋仲有張相片喺手呀！你話壹全霉係唔係好有品呢？
