潮語「7左」嘅意思如果用白話講就即係「笨了」，係用嚟形容人做咗啲好笨嘅事，又或者自我呻笨嘅意思。數字「7」係一個粵語粗口字嘅諧音，網上面除咗用7呢個數字外，有時會用「柒」呢個中文字，所以「7左」可以寫成「柒咗」。同時，粵語粗口「7」或「柒」都係有笨嘅意思。

世紀感情騙子陳振聰終於逃唔過法律制裁，因為偽造同行使假遺囑被判入獄12年。其實佢今次唔係衰「騙財騙色」，因為香港法例並無一條罪，係用嚟懲罰人欺騙感情。其實令佢衰入冊嘅主要原因係太貪心，法官話佢係貪婪、邪惡同無恥，真係講得非常之啱。其實，姑勿論陳與龔是否真心相愛，從陳振聰一開始同龔如心一齊，就由一個市井神棍，升呢為億萬富豪，理應心滿意足。但佢竟然到人死咗都仲唔收手，仲要出賣佢哋之間嘅床笫之事，仲要繪影繪聲咁講晒出嚟，最終一無所有之餘仲要受牢獄之劫，真係惡有惡報……總之就係「7左」！

「7左」始終係事過境遷，有一種悔不當初嘅感覺，所以有時做人唔想咁「7」就真係要時刻打醒十二分精神，「7少陣」當幫幫手。尤其依家時值7月，我哋嘅特衰政府，7．1面對幾十萬人冒着風雨上街，依然7吓7吓……到底佢係唔係當香港人「笨7」？最「7」嘅係，香港人連自己「7左」都未知！

第一手消息請下載on.cc東方互動iPhone/iPad/Android/Windows Phone Apps