政壇：搞搞政：謝偉銓爆地產商迷信
設計圖片及對白
陳振聰被判監十二年，事件成為唔少人茶餘飯後嘅話題，曾經喺多間大地產商任過職嘅立法會建築、測量及都市規劃界議員謝偉銓（Tony）話，其實唔少地產商篤信風水命理，唔單止起樓前要為地皮睇風水，每次動工同竣工賣樓前都要拜過神先至安樂。雖然Tony本身唔信風水命理之道，但都遇過一啲奇怪事。
設計圖片及對白
Tony話，早年新盤交投非常淡靜，當時佢任職嘅地產商仍然準備推出新樓盤，雖然佢同其他同事一早已經打定輸數，但仍然堅持傳統習俗燒香拜神。世事就係咁奇怪，唔知點解拜神後，新盤開售竟然吸引唔少投資者買樓，令Tony喜出望外。之後又有一次，Tony公司唔知因為咩原因而冇拜神，結果樓盤就賣得麻麻哋，搞到佢都覺得拜咗神會好啲咁。後來Tony跳槽去新公司，每年會與同事去拜車公保佑來年工作順利。佢話雖然自己唔信風水，但都樂於參與各種拜神儀式，因為一定有燒豬食。
家住東區嘅佢又話，曾經有個對風水甚有研究嘅同事話佢屋企風水麻麻，又話佢南區舊屋啲風水好啲，但佢都係一笑置之。Tony認為，凡事都唔好盡信，要對自己嘅決定有多啲信心，否則條命生得幾好都無用喎。
