政壇：馬逢國搞藝術攞「膽」
西九文化區嘅基建屢傳超支，立法會體育、演藝、文化及出版界議員馬逢國尋日舉行藝術教育講座，邀關注者一齊「腦震盪」，不過講台上嘅大型橫額就出醜，竟然將藝術教育前瞻誤寫為「前膽」，莫非馬逢國認為搞藝術教育最緊要有膽色？認真攞膽！
張相係由一位姓冼嘅參加者出席講座時，眼明手快發現並分享到社交網站，結果引來網民熱議，有網民笑言，可能真係要「有膽」先好搞藝術。亦有網民揶揄，呢啲低級錯誤都可以出現，反映在位者、教育工作者都唔見得有幾好，所以唔好成日話香港年輕人語文水平每況愈下喎。馬逢國接受查詢時形容，呢個並非手民之誤，其實係「腦」民之誤，因為係同事叫橫額公司製作，錯誤係源於電腦打錯字，佢本人都係去到現場先見到呢個問題。咁會唔會擔心被網民借題發揮呀﹖馬逢國好大方話無所謂。
