政壇：林貝聿嘉話入婦協保青春
林貝聿嘉分享婦協一班創會姊妹嘅陳年舊照，賣口乖話大家冇老到。
香港各界婦女聯合協進會（婦協）尋晚舉行晚宴慶祝成立二十周年，主席林貝聿嘉同大家分享一班創會姊妹嘅陳年舊照，晚宴場刊仲刊載該批舊照，只見除咗梁愛詩多年來連髮型都冇變過外，其他委員無論髮型定形象都已經大變身。搵來搵去，相信唯一個樣冇乜點變嘅就係林太，就連主席個位亦一坐就二十年，冇變過。
林貝聿嘉分享婦協一班創會姊妹嘅陳年舊照，賣口乖話大家冇老到。
齊齊着旗袍現身
婦協嘅大日子，創會委員范徐麗泰同梁愛詩都應邀出席，唔少會員尋晚仲特別以旗袍打扮現身，盡顯東方美。林太致詞時講到，婦協呢二十年發展不但快過中國嘅航天科技，連一班創會姊妹都冇咩點變，反而後生咗添！唔係嘛，返老還童？其實林太嘅意思係班好姊妹多年來一直喺精神、金錢同行動上支持婦協，心境開朗自然青春常駐，佢仲呼籲女士加入婦協保容顏喎。
