政壇：劉展灝要幫工總攞大獎
四大商會之一嘅工業總會日前舉行周年大會午宴，副主席兼運年表業集團董事總經理劉展灝（Stanley）接棒做新一屆主席，當日到賀嘅政商名人數以百計，最特別嘅係行政及立法雙料議員林健鋒（Jeffrey）一家人，事關佢哋三代人同場出現，Jeffrey同爸爸林亮、囝囝林凱章外，連外甥兼工總青委副主席陳允誠都有到。
卸任嘅前主席鍾志平（Roy）心情輕鬆，致詞時公開向Stanley「施壓」，要佢喺未來兩年任期內幫工總攞個「最佳管治獎」返嚟，台下賓客隨即拍掌呼應。不過，Stanley冇有怕，笑笑口話會同工總同事盡力完成呢個任務。查實Stanley早年擔任香港表廠商會會長時，曾獲香港董事學會頒發非牟利機構最佳管治獎，成為第一間獲此殊榮嘅機構，難怪佢胸有成竹。
早前Jeffrey喺中環設宴請客，傳聞話佢中咗六合彩頭獎，我哋趁呢個機會求證，佢就澄清從未買過六合彩，請客皆因早前以十元買馬中咗五萬多彩金！
