政壇：港鐵指揮重地嚇親議員
王國興（左三）、范國威（右一）同交通事務委員會幾個議員參觀港鐵車務控制中心，身後就係巨型嘅顯示屏。（受訪者提供）
立法會交通事務委員會尋日應邀參觀港鐵青衣車務控制中心，平時對港鐵諸多不滿嘅王國興（阿王）同范國威（Gary）一改往日嘅態度，阿王仲大讚中心規模媲美內地嘅衞星發射中心，Gary就形容「超級」車務控制中心同美國太空總署有得揮，講得真誇張。咁港鐵今次算唔算「軟銷」成功呢？技術上係，但改變唔到議員對票價嘅不滿，轉個頭民生派議員已要求港鐵減票價。
王國興（左三）、范國威（右一）同交通事務委員會幾個議員參觀港鐵車務控制中心，身後就係巨型嘅顯示屏。（受訪者提供）
港鐵呢個指揮重地來頭唔細，除咗輕鐵線，全港十條港鐵線嘅一切動靜，都盡收控制中心嘅巨型弧形銀幕下，議員參觀期間，撞啱有乘客喺九龍塘站按緊急掣，電視廣告出現嘅巨型電子鐘隨即計時，連Gary都話過程幾緊張吓！
阿王就引述港鐵透露，東鐵線遲啲會率先喺馬場站加裝幕門，順利嘅話就會陸續喺其他車站照做。
