設計圖片及對白

好多人都話,本港嘅鄉村傳統同歷史問題係一本好難明白嘅書,政圈中人都對鄉村勢力開拓有老鼠拉龜嘅感覺。 早前疑就新界村屋僭建問題同新界鄉議局打對台,繼而發起「小雨點行動」嘅一班村民及村代表尋日喺元朗舉行記者會,正式宣布組成「新界關注大聯盟」,大聯盟嘅靈魂人物唔少得發起早前行動嘅屯門鄉事委員會主席何君堯,同聯盟主席鄧鎔耀啦!今次鄉村勢力另起爐灶,係唔係同鄉議局分庭抗禮呢﹖

設計圖片及對白

立場料更放

何君堯梗係否認,話佢哋同鄉議局算係合作關係,只係鄉議局係港府法定嘅諮詢組織,而佢哋就係民間組織。至於大聯盟關注嘅事務就多囉,佢哋唔單止關心原居民問題,遲啲或者會有位於新界屋苑嘅業主立案法團負責人加入添。鄧鎔耀都話,有啲事情鄉議局會有掣肘,但如果村民反對政府嘅政策,佢哋大聯盟都可以發聲。

呢個說法嘅潛台詞似乎係佢哋喺鄉村事務嘅立場上可能比鄉議局更放,因為鄉議局同政府關係更密切,而來自民間嘅大聯盟就少啲負擔。咁大聯盟將來會唔會在多場選舉有更多發揮呢﹖何君堯就話,暫時未有呢個打算。

不過,大聯盟尋日都派發咗疊頗舊嘅文件,詳列佢哋嘅立場,如反對新界村屋僭建物申報計劃、擴建堆填區及支持興建屯荃鐵路等。此外,機場擴建第三條跑道、新界東北發展及提升村代表津貼都有提及,真係新界乜都關佢哋事。鄧鎔耀話,依家聯盟有五十名會員,逾千名支持者,唔使太多營運成本,資金來自大家內心喎。

第一手消息請下載on.cc東方互動iPhone/iPad/Android/Windows Phone Apps