City Snapshot：馬逢國揀板腦 寧缺毋濫
馬逢國（左）拎起平板電腦又睇又試，個心十五十六，最終依然空手而回。
最近有晚喺金鐘見到立法會體育、演藝、文化及出版界議員馬逢國，佢走入金鐘廊一間電訊公司，對店員推介嘅一部平板電腦好感興趣，拎上手睇完又摸，個心十五十六咁，但最後都係冇買就離開。
馬逢國（左）拎起平板電腦又睇又試，個心十五十六，最終依然空手而回。
馬逢國除咗做議員外，仲擔任唔少公職，佢覺得平板電腦好有用，尤其每次開會都要擺住成吋厚嘅文件，有時一日開四、五次會，疊文件都咪話唔重。雖然佢依家都有用平板電腦，但部電腦並唔係屬於佢，而係佢問囝囝借用嘅，所以始終都要買番部自用。
要輕薄又要瀟灑
對於平板電腦，馬逢國自言要求好高，既要夠輕夠薄，帶出街瀟灑啲，仲要電池耐用，而最緊要係顯示屏幕要夠大，咁樣睇文件至會睇得清楚，萬一睇錯字，誤解咗文章意思就唔好啦！就係因為要求多多，佢至今尚未物色到一部稱心嘅平板電腦，但佢笑言，科技日新月異，相信不久將來就會有部啱佢心水嘅產品誕生，現階段都係「寧缺毋濫」好喇！
