設計圖片及對白

最低工資法例訂明，本地嘅大學生做實習時，僱主可以豁免唔使畀最低工資，但如果港人到外國讀大學，想喺暑假返港做暑期工，咁就無得豁免喇！如果啲公司或政黨真係要請外國留學生做實習，一係要畀足最低工資，一係就一個仙都唔畀得。就因為相關法例無豁免外國留學生，令新民黨同富貴黨被指做「無良僱主」。

設計圖片及對白

富貴黨中人透露，該黨今年有兩、三個實習生喺外國返港，但由於法例寫明無得豁免支付最低工資，惟有只向實習生支付象徵式車馬費，證明最低工資法例會削弱大學生競爭力咁話。點解該黨唔肯畀足錢呢？據聞該黨認為畀足最低工資，咁做會對其他本地實習生好唔公平，如果所有實習生都畀最低工資，咁就對正職員工好唔公平喎！黨魁田北俊又知唔知呢件事呢？

至於新民黨，由於黨主席葉劉淑儀當年棄官留學嘅效應，該黨就最多「竹升仔」、「竹升妹」，今年仲一口氣收咗十幾個外國留學生，咁點算呢？葉劉話惟有壓縮同學仔嘅實習期，由三個月縮減至個半月，咁就符合法例，又可以畀番幾千元班同學仔做「水腳」。

葉劉話當初最低工資立法時，已同勞工及福利局局長張建宗講咗幾十次，認為只要大學生就可以豁免，如果只限本地大學生，會令唔少國際企業收生出現問題，咁搞法，香港仲點做到國際之都呢？

第一手消息請下載on.cc東方互動iPhone/iPad/Android/Windows Phone Apps