政壇：黃靜文入馬場樂做義工
施榮懷（中）喺本月新舊行政總裁交接期間，有黃靜文（左）同梁世華（右）兩個得力助手搞會務。
中華廠商聯合會尋日喺沙田馬場舉行紀念盃賽，雖然懸掛三號風球兼落雨，仍無阻會長Irons施榮懷同一班會董拉大隊入場湊熱鬧。今年廠商會盃賽最特別嘅，就係有兩個行政總裁同場出現，包括新上任嘅Adeline黃靜文同本月底卸任嘅梁世華。
施榮懷（中）喺本月新舊行政總裁交接期間，有黃靜文（左）同梁世華（右）兩個得力助手搞會務。
梁世華喺新卡片上自稱長者及退休人士，認真幽默。
尋日係七一公眾假期，所以Adeline應該今日先履新，難得佢唔介意做義工，滿場飛同會董及賓客打交道。佢坦言可以借呢個機會對商會加深認識，事關會董有成一百個，要記晒每一個名唔容易。
曾任民政事務總署副署長嘅Adeline話以前專責慈善團體有關事務，今次再見番啲老友感覺好親切，往後亦會加強廠商會同善團嘅聯繫。見佢苗條咗喎，佢話以前做官坐得多冇運動，卸任後多走動反而瘦咗。梁世華就大讚Adeline好幫得手，可以安心交棒。佢仲派咗張新卡片，上面自稱「長者/退休人士」，認真幽默。
