政壇：政界抗拒 被標籤「梁粉」
喺舊年嘅特首選舉中，外界將兩名候選人嘅支持者劃分為「梁粉」同「唐營」，呢個劃分方式延續至今，其中被標籤為「梁粉」嘅多數會被人金睛火眼(目及)到實，只要稍有差池就會被人窮追狂打，故此有「深梁」對於被稱為「梁粉」有一套應對方法，就係寧願認做麵粉都唔認做「梁粉」。
此話何解？有知情人士話「梁粉」同涼粉嘅讀音一樣，用處單一之餘仲只可以用嚟食，相反麵粉可用做唔同類型嘅製成品，迎合不同需要，靈活性大好多，因此有得揀一定做麵粉都唔做「梁粉」喎！
另有政界人士亦對「梁粉」呢個標籤好抗拒，就好似最近候任嶺南大學校長鄭國漢同候任公開大學校長黃玉山，都被人形容為「梁粉」，咁啱事後惹來學生強烈反對有關任命，究竟係咪「非梁粉」就可逃離一劫，呢個就真係誰也說不準。
講開「梁粉」，有政界中人最近有個開心大發現。話說有人察覺行政會議成員張志剛見親人都好少同人握手，多數只係同人做拜年手勢打招呼，原來佢本身係多手汗之人，為免同人握手時多汗到令人怕怕，決定少握為妙喎。
