政壇：工聯頭痕搵人要出位
設計圖片及對白
雖然立法會劃區同政改方案仲未出爐，但距離下屆立會選舉只有三年，唔少政黨都已布好防線。之不過，由上屆選舉開始打正旗號參選嘅工聯會，至今都竟然仲未諗掂各區擺位。我哋聽聞就連現任嗰六位議員下屆被分派去邊一區選都未諗掂。不過，有熟識工聯會嘅人士透露，近日喺工會入面有意見認為，首先決定派邊位出戰新界東，就要睇大家嘅見報率喎！咁講嘅話，咪只有佢哋嘅「阿姐」陳婉嫻同「阿王」王國興可以出戰新界東？
設計圖片及對白
增見報率谷知名度
其實見報率同代表工聯會出選新界東又有乜嘢關係呢？有熟識工聯會嘅人士話，根據工聯會領導層嘅觀察同分析，原來佢哋覺得今屆新界東嘅議席就係輸在代表佢哋嘅葉偉明知名度仍唔及其他候選人高，加上大部分贏得呢個直選議席嘅議員，如果唔係本身知名度高，就係喺選舉期間夠出位。不過，出位一向都唔係工聯會嘅作風，如果咁講，可能只有阿王一個可憑住「日以繼夜，夜以繼日」，先至合資格喎！
呢班領導層又觀察當選新界東嘅議員表現，話就算佢哋當選後，見報率都較其他議員高。所以就一致認為，嚟緊派選新界東嘅成員就算行為出位啲都冇所謂，最重要係知名度高咁話。據聞，有人都有噏過吓佢哋嘅勞工界議員鄧家彪，之但係佢既唔夠出位，知名度又唔高，所以都未講得準。
其實喺工聯會入面，所謂知名度，又或見報率夠高嘅議員，唔係當選超級議員嘅嫻姐，就係參選過兩個選區，又但凡轉區都順利勝出嘅阿王，咁係咪意味嫻姐同阿王是但一個轉去新界東參選呢？
